Тахан вай мехка дезду доккха ц1ай – Наьна метта ди.
Вай къаман къаьстта лерх1ам бе безаш ди да из. Д1аяхача замалахь х1анз санна аьттув хиннабац вай къаман метта хьал тахка а, из дег1абоалабе меттел, из массанахьа лебе а. Сага са да из — наьна мотт. Лебеча меттага хьежжа хул наха юкъера сага лоарх1ам а. Вай даьй дешаш да: «Наьна мотт — дунен кор», «Наьна мотт — Даьла совг1ат» — яхаш. Из кор баьддерзийта а Даьла совг1ат тишде а йиш яц вайга. Даьша а ноаноша а цох доаккхал деш метта ганз йитай вайна, вайх шоай йоакхо еш. Цун хам бе а из т1ехьенга д1акхачийта а вай декхарийла да. Т1аккха цар шоай т1ехьенга а т1ехьен т1ехьенга а д1акхоачийтаргья из метта ганз.
Безача маьхе да ший мотт ц1ена хар. Ше ц1ена бувцарца йоаккх метто ший хозне. Дала низ лолба вайна массанена а из к1оаргга 1омабе а цун къайленаш йовза а!
